21.11.15

மீண்டும் நரகாசுரன்



நேற்று
மீண்டும் வந்தான்
இல்லாப் பெயர்கொண்ட
மூட நரகாசுரன்.

ஆண்டு முழுவதும்
அரும்பாடுபட்டுச்
சம்பாதித்த பணத்தையெல்லாம்
வெடியாகக் கொளுத்திக்
கரித்தான்;
புகைத்தான்.

கூரை வேய்ந்திருந்த அந்த
ஏழை வீட்டின்
ஓலைக் குடிசையையும்
வெடியால் கொளுத்திச்
சாம்பலாக்கினான்.

வெடி எனும்
ஆயுதம் கொண்டு
பலரைக் காயப்படுத்தினான்;
சிலரைக் கொன்றான்.

மற்றோரெல்லாம்
சீக்கிரம் இறந்திடவே
நச்சுப் புகையால்
சுற்றுச்சூழலை
நாசப்படுத்தி
மரணவலை விரித்தான்.

வீதிகளையெல்லாம்
குப்பைகளாக்கித்
தோட்டிகளுக்கு
வேலை கொடுத்தான்.

கடும் சப்தவெடிகளை
இரவினில் வெடித்து
எங்களின்
இரவுத் தூக்கத்தைக்
கெடுத்தான்-அவன்
மகிழ்ந்தான்.
மீண்டும்
அடுத்த ஆண்டு
வருவேன்-என
எச்சரித்துச் சென்றான்.

                                                     -பாகவியார்
================================


17.10.15

ஆணாகப் படைத்ததேன்?


                                                -பாகவியார்
இறைவன் உன்னை
ஆணாகப் படைத்ததேன்?
பெண்ணை
நிர்மூலமாக்க அல்ல!
நிர்வாகம் செய்யத்தான்!
அவளின் கற்பைச்
சூறையாட அல்ல!
உன் சகோதரியாய்க்
கவனித்துக்கொள்ளத்தான்!
கண்ட இடங்களில்
வம்பு செய்ய அல்ல!
உன் அன்னையைப் போல்
அன்பு காட்டத்தான்!

உன்னை
ஆணாகப் படைத்ததேன்?
பெண்ணிடம்
கைநீட்டிப்
பெறுவதற்காக அல்ல!
மஹர் கொடுத்து
மங்கை நல்லாளை
மணமுடிக்கத்தான்!

உன்னை
ஆணாகப் படைத்து
நிதானத்தை வழங்கியதேன்?
அவள் அறியாமையால்
சினம் கொள்ளும்போது
மனம் வெதும்பாமல்
எதிர்கொள்ளத்தான்!

உன்னை
ஆணாகப் படைத்து
வீரத்தை வழங்கியதேன்?
கட்டிய மனைவியை
ஓங்கி அடிப்பதற்காக அல்ல!
அவளுக்கொரு
துன்பமென்றால்
துணிவோடு போராடத்தான்!

உன்னை
ஆணாகப் படைத்து
பொறுப்பை வழங்கியதேன்?
அவள் உழைப்பில் நீ
உண்பதற்காக அல்ல!-நீ
உழைத்து
அவளுக்கு
உணவு வழங்கத்தான்!

உன்னை
ஆணாகப் படைத்துப்
பெண்ணைவிட
ஒரு படி
உயர்வைக் கொடுத்ததேன்?
அவளை அடிமையாய்
நடத்துவதற்காக அல்ல!
அவளின் தேவைகளை
முறைப்படி

நிறைவேற்றிடத்தான்!


17.4.14

அழகினும் அழகு! (கவிதை)


அழகினும் அழகு!

படையென மக்கள் புடைசூழ்ந்த சபையில்-நீ
படைத்த இறைவனுக் கஞ்சுவது அழகு
அடைத்த அறைக்குள் ஒண்டியாய் இருந்தும்
படைத்த வல்லோன் இறைவனுக் கஞ்சுவது
அழகினும் அழகு!

உரைத்த சலாமுக்கு உரிய முறையில்
உரைத்தாற்போல் மறுமொழி யுரைத்தல் அழகு
உரைத்த சலாமுடன் உபரியாய் ஒருசொல்
நிறைத்தே நிறைவாய் மறுமொழி யுரைத்தல்
அழகினும் அழகு!

கொலைசெய்த கொலைகாரன் தீயவன் அவனுக்கு
கொலைக்குக் கொலையென நீதிவழங்குதல் அழகு
கொலைசெய்த அவனை மறந்தே மன்னித்து
கொலையுண்ட குடும்பத்தார்க்கு இழப்பீடு வழங்குதல்
அழகினும் அழகு!

தீங்கிழைத்த ஒருவனுக்கு அத்தீங்கின் அளவுக்குத்
தீங்கிழைத்தல் இஸ்லாமியச் சட்டப்படி அழகு
தீங்கிழைத்த அவனின் அத்தீங்கை மன்னித்து
தீங்கிற்குப் பதிலாக நன்மையே  செய்தல்
அழகினும் அழகு!

அளவிடும் பொருளை முறையாக அளத்தல்
அளவிடும் மனிதர்கள் யாவர்க்கும் அழகு
அளவிடும் பொருளோடு உபரியாய்க் கொஞ்சம்
அளவிற்கு மேலாக உவப்புடன் ஈவது
அழகினும் அழகு!

தொழுகைக்குச் செல்லுமுன் உடலுறுப்புகள் தமையே
முழுமையாய் ஒருமுறை கழுவுதல் அழகு
முழுமனிதர் நாயகத்தின் நடைமுறை பேணி
முழுமையாய் மும்மூன்று தடவை கழுவுதல்
அழகினும் அழகு!

திக்கற்ற மனிதர்க்கு முறையான திக்கைப்
பக்கத்தில் சென்று ரைத்தல் அழகு
திக்கற்று நிற்கும் மனிதர் நாடுகின்ற
திக்கின் இலக்கில் உடன்சென்று சேர்த்தல்
அழகினும் அழகு!

ஆண்மையற்ற ஆடவனுக்கு வாழ்க்கைப்பட்ட பெண்ணொருத்தி
ஆங்காரம் கொள்ளாமல் பிரிந்திடுதல் அழகு
ஆண்மையற் றிருந்தாலும் மறுமையின் நன்மைநாடி
ஆங்கே அவனோடு பொறுமையுடன் வாழ்தல்
அழகினும் அழகு!

மணவாழ்க்கை கொடுத்த கணவனுக் கடங்காதவளை
மணமுறிவு செய்தல் சட்டப்படி அழகு
மணப்பெண் அவளோ தொல்லையே கொடுத்தாலும்
மனந்திறந்து மன்னித்து மகிழ்வுடன் வாழ்தல்
அழகினும் அழகு!

சுயநல மாயினும் மக்கள் நலம்நாடி
உயர்ந்த சேவை யாற்றுதல் அழகு
சுயநலமின்றி மறுமைப் பயன்நாடி மக்கள்
உயர்வுக்காக உவப்புடன் தொண்டா ற்றுதல்
அழகினும் அழகு! 






21.5.12

முனையாமல் முடங்கலாமா?



திருக்குர்ஆன் விரிவுரையைத்
தினந்தோறும் திறந்தோதுவோர்
திருக்குறளைத் திறந்திட்டால்
திருக்கரங்கள் கறையாகுமோ?


குர்ஆனைத் தொடும் கரங்கள்
குவலயத்தை இணைக்கின்ற,
குக்கிராமத்தில் பரவிவிட்ட
இணையத்தைத் தொடுவது
இணையற்ற தீங்காகுமோ?


அல்லாஹ்வின் வேதத்தை
நன்றாகக் கற்றவர்கள்
ஆட்சியர் ஆகுவதும்
அதிகாரத்தைப் பெற முனைவதும்
அடாத பாவமாகுமோ?


அருள்மறையின் மொழியான
அரபிமொழி கற்றவர்கள்
ஆங்கிலத்தைக் கற்பது
அல்லாஹ்வுக்கு எதிராகுமோ?


அரபிக் கல்லூரிக்குள்
ஆங்கிலமும் கணினியும் 
அவசியம் கருதி
அன்றாடம் கற்பித்தல்
ஷரீஅத்துக்கு முரணாகுமோ?


ஒரு வட்டத்திற்குள்
ஒடுங்கிவிட்டவர்கள்
வட்டத்தின் வெளியே
எட்டிப் பார்க்க முனைவது
வெட்டி வேலையாகுமோ?


எட்டாக் கனியை
எட்டிப் பிடிக்கத் துணிவதும்
கிட்டாத பணியை
முட்டிமோதிப் பெறுவதும்
சட்டப்படி பிழையாகுமோ?


பிறருக்குப் போட்டியாய்
போட்டியிட்டு உழைப்பதும்
பிறருக்குப் போட்டியாய்
போட்டியிட்டுச் சம்பாதிப்பதும்
இஸ்லாத்தில் தடையாகுமோ?


காலமே கருதி
கடமையைச் செய்யாமல்
காலம் தாழ்த்தி,
கல்போன்று வாழ்வது
கல்வி கற்றோர்க்கு அழகாகுமோ?


காலத்தின் அருமை கருதி 
பல்வகைத் திறமைகளை 
நல்வகையில் பெருக்கிக்கொள்ளல்
எவ்வகையில் பாவமாகுமோ?


உலக மக்கள் யாவருமே
உயரப் பறக்க முனையும்போது-நீ
ஒடுங்கியே வீட்டுக்குள்
நடுங்கியே வாழலாகுமோ?
விழிக்காத உன் கண்கள்
வழிதேடாமல் உறங்கலாகுமோ?


உன் வாழ்வில் நீ உயர
நான் உனைத் தூண்டுவது
என்மீது பிழையாகுமோ?
உன்மீது பிழையாகுமோ?


28.4.12

வாழ்த்து மடல்

என் தம்பியின் திருமணத்தை முன்னிட்டு நான் எழுதி வழங்கிய வாழ்த்து மடல்.